Sigurvegari í Mottumars keppninni dreginn út

Kristín Magnadóttir er heppinn sigurvegari sem dregin var út að lokinni keppni
Kristín Magnadóttir er heppinn sigurvegari sem dregin var út að lokinni keppni

Í Mottumars í ár var haldin keppnin “Hættu nú alveg” í samstarfi Krabbameinsfélagsins, Krabbameinsfélags Reykjavíkur og Ráðgjafar í reykbindindi (RÍR) þar sem keppt var í tóbaksbindindi. Alls skráðu sig til keppni 60 einstaklingar og meirihlutinn eða 58% náði að verða tóbakslaus meðan á keppni stóð. Við óskum öllum keppendum til hamingju með árangurinn og hvetjum þá sem ekki náðu að verða lausir við tóbak til að gefast ekki upp og reyna áfram þar til markmiðið næst.

Sigurvegari keppninnar var dreginn út að lokinni keppni og sú heppna er Kristín Magnadóttir sem nú er hætt að reykja eftir 50 ár. Að sögn Kristínar er aldrei of seint að hætta og finnur hún mikinn mun á heilsu sinni nú þegar.

Kristín fékk afhent vegleg verðlaun sem samstarfsaðilar Krabbameinsfélagsins gáfu til keppninnar.  Wow gaf sigurvegaranum flug fyrir tvo til Evrópu, Þyrluþjónustan gaf útsýnisflug fyrir tvo yfir Reykjavík og fjöllin í kring með lendingu á Esjunni og Hótel Rangá gaf gistingu í eina nótt með þriggja rétta kvöldverði og morgunverðarhlaðborði fyrir tvo og Olís/ÓB gaf 50.000 kr. inneign.
Krabbameinsfélagið þakkar samstarfsaðilum kærlega fyrir dýrmætan stuðning og óskar vinningshafanum innilega til hamingju með betri heilsu og þessi veglegu verðlaun.

Um keppnina

  • Karlar voru í miklum meirihluta keppenda eða 72%.
  • Flestir keppenda notuðu sígarettur eða 47%. Munntóbak notuðu 42%, 18% rafsígarettur og 8% neftóbak. Þó nokkrir notuðu fleiri en eina tegund tóbaks.
  • Meðalaldur keppenda var 35 ár en elsti keppandinn var 72 ára og sá yngsti 16 ára.
  • Fjórðungur keppenda hefur valið að vera áfram í stuðningi hjá Ráðgjöf í reykbindindi.

Keppendur gátu skráð sig til að taka þátt og vera í tóbaksbindindi frá 29. mars til 2. maí.
Ráðgjafar hjá Ráðgjöf í reykbindindi höfðu samband við keppendur bæði með tölvupóstum og símtölum. Reynt var að vera í sambandi við keppendur í hverri viku og tókst það að mestu. Eftir að keppni var lokið þurftu keppendur að senda inn vottaða staðfestingu á tóbaksleysi sínu  meðan á keppni stóð.
Í nokkrum tilvikum náðu keppendur ekki að standast bindindið allan tímann en voru samt tóbakslausir í lok keppni. Þeir keppendur duttu því út úr keppninni þó svo þeir væru hættir 2. maí.
Margir þáðu áfram stuðning ráðgjafa og fá áframhaldandi stuðning í allt að eitt ár.