Framsýn gefur tvær milljónir til tækjakaupa

Stéttarfélagið Framsýn færir Styrktarfélagi Heilbrigðisstofnun Þingeyinga á Húsavík veglega gjöf.
Stéttarfélagið Framsýn færir Styrktarfélagi Heilbrigðisstofnun Þingeyinga á Húsavík veglega gjöf.

Framsýn stéttarfélag hefur ákveðið að færa Styrktarfélagi Heilbrigðisstofnunar Þingeyinga á Húsavík  tvær milljónir króna til tækjakaupa. Er það til minningar um Kristján Ásgeirsson fyrrverandi formann Verkalýðsfélags Húsavíkur, nú Framsýnar stéttarfélags og var ákvörðun þess efnis tekin á stjórnarfundi félagsins.
Undanfarna mánuði hefur staðið yfir söfnun fyrir nýjum hjartaeftirlitstækjum á sjúkradeild stofnunarinnar á Húsavík. Ætlunin er að kaupa eftirlitstæki sem samanstendur af nettengdum tækjum; vöktunartæki á vaktherbergi, tveimur veggföstum skjám til að hafa eftirlit með rúmliggjandi sjúklingum og tæki til að fylgjast með sjúklingi sem ekki er rúmliggjandi. Með tækjunum er hægt að mæla blóðþrýsting, öndun, súrefnismettun, púls og sjá hjartasláttarrit.
Gömlu tækin eru löngu komin á tíma og ekki lengur hægt að fá varahluti í þau ef þau bila. Nýju tækin kosta um 8 milljónir.
Framsýn vill nota tækifærið og skora á velunnara stofnunarinnar að leggja til fjármagn til kaupa á þessu mikilvæga tæki fyrir HSN á Húsavík.

Styrktarfélag Heilbrigðisstofnunar Þingeyinga þakkar Framsýn höfðinglega gjöf.