Heimsóknir á hjúkrunar- og sjúkradeildir HSN

Í ljósi þess að landamæri Íslands hafa verið opnuð að hluta og fleiri smit hafa greinst í samfélaginu vill HSN ítreka reglur varðandi heimsóknir á hjúkrunar- og sjúkradeildir.

  1. Alls ekki koma í heimsókn ef:
    • Þú hefur verið erlendis og ekki eru liðnir 14 dagar frá komu til landsins.
    • Þú ert í sóttkví.
    • Þú ert í einangrun eða að bíða eftir niðurstöðu úr sýnatöku.
    • Þú hefur verið í einangrun og ekki eru liðnir 14 dagar frá útskrift.
    • Þú ert með einkenni (kvef, hósta, hita, höfuðverk, beinverki, þreytu, kviðverki, niðurgang o.fl.).

  2. Mikilvægt er að hafa í huga að hjúkrunardeildir eru heimili þeirra sem þar búa og íbúar þeirra eru viðkvæmir hópar. Til þess að virða rétt þeirra íbúa sem vilja takmarka samskipti við aðra sér til verndar, en jafnframt njóta þess að vera í setustofu á heimili sínu eiga heimsóknargestir eingöngu að vera í heimsókn inni á herbergi íbúa.

  3. Af virðingu við aðra íbúa biðjum við um að heimsóknir séu ekki á matar- og kaffitíma.

  4. Íbúum er áfram heimilt að fara í gönguferðir með sínum nánustu og einnig er heimilt að fara með íbúa út af heimilinu, í bílferðir eða heimsóknir, viðburði eða annað.

Það er mikilvægt að hafa í huga að baráttan gegn COVID-19 er ekki unnin og smitum getur fjölgað hratt eins og reynsla hefur kennt okkur. Ef það gerist þurfa heimilin að grípa aftur til ákveðinna aðgerða og takmarkana.

Áfram skal gæta að grundvallarsmitgát og gæta vel að handþvotti og sprittun handa.