Samstarf um velferðartækni í heimahjúkrun og heimaþjónustu

Heimahjúkrun á Akureyri
Heimahjúkrun á Akureyri

Heilbrigðisstofnun Norðurlands og Akureyrarbær eru komin í samstarf um aukna samþættingu heimahjúkrunar og heimaþjónustu með hjálp Memaxi samskipta- og skipulagslausnarinnar.

Memaxi hjálpar þjónustuveitendum í heilbrigðis- og velferðarþjónustu að skipuleggja persónumiðaða þjónustu og auðveldar samskipti við einstaklinga og aðstandendur. Þjónustuþegar, hvort sem er í sjálfstæðri búsetu eða búsetu með stuðningi, geta fylgst með eigin dagskrá og upplýsingum á einföldum spjaldtölvuskjá og átt í samskiptum við fagfólk og aðstandendur, meðal annars með myndsamtölum.

Samstarfsyfirlýsing HSN og Akureyrarbæjar snýst um 12 vikna tilraunaverkefni um samþættingu á notkun búnaðar frá Memaxi, deilingu á almennum upplýsingum um umönnun þjónustuþega með það að markmiði að bæta skilvirkni í störfum þeirra sem veita þjónustuna, auka öryggi og bæta þjónustu. Engum viðkvæmum persónugreinanlegum upplýsingum, svo sem heilsufarsupplýsingum, verður safnað og eru allir starfsmenn bundnir trúnaði og fyllsta öryggis gætt varðandi skráningu almennra upplýsinga í samræmi við persónuverndarlög.